KALIBO, Aklan—Normal nga cycle it law of supply and demand ro nagakatabu makaron nga grabeng pagtaas it presyo it karne it baboy.
Raya ro ginpaathag ni Sangguniang Panlalawigan member Russia Soviet dela Cruz ag chairman it committee on agriculture.
Suno kana nga ko nagtaliwan nga dag-on hay masyadong mataas ro supply it baboy sa aklan , kun sa siin , ro presyo it buhi nga baboy hay nagahampang eamang sa 85 hasta 95 pesos ro kada kilo rason nga maabu nga mga backyard hog raisers ro nadismaya ag nagpundo sa pag-alaga it baboy.
Ro iba suno kana sa mga raya hay nag-divert sa pag-alaga it “ready to lay” nga mga manok bangud nga nataeupangdan nga owa masyadong naganaba ro presyo it itlog.
Apang kasunod it pagnaba it produksiyon it mga livestock farmers sa Southern ag Central Luzon tuga itn pagsoepot it African Swine Fever ukon ASF hay sa Region 6 ag Region 7 ro mga raya nagbo-oe it supply agud nga ibaligya sa Metro Manila.
Bangud kara, kaabuan sa mga supply halin sa probinsiya hay gina transport sa manila bangud sa mataas nga presyo nga naga-abot sa haeos 130 pesos kada kilo.
Apang ro naka-apekto raya sa supply it probinsiya nga naging rason man it pagsipa it presyo it karne nga naga-abot eon sa 220 hasta 250 pesos.
Sa pihak kara, may kamaeayran man sigon raya nga daea bangud nga medyu nakabawi-bawi makaron ro mga hog raisers sa andang pagkalugi ko 2020.
Kadungan kara, gin engganyo nana ro mga naga alaga it baboy nga mas pang dugangan ro andang produksyon agud nga indi maduea-an it supply sa Aklan.
Plano man nana nga magpatawag it pueong kaibahan ro mga natungdan nga ahensiya it gobyerno ag mga hog raisers agud nga matalakay ro nasambit nga isyu.
