Philippine Army, owa direktang gintumod nga kaibahan ro Aklan State University sa mga target nga pagahiwatan it recruitment it rebeldeng grupo nga CPP-NPA

KALIBO, Aklan—Owa direktang gintumod it Philippine Army nga nakabase sa probinsiya it Aklan nga kaibahan ro Aklan State University sa mga target nga pagahiwatan it recruitment it rebeldeng grupo nga CPP-NPA.

Raya ro ginkumpirma ni Lt Col. Ogie Villan, Acting Commanding Officer it 3^rd Division Cafgu Administrative Affairs Unit nga nakabase sa camp Libas, Banga.

Kasunod  raya it ginpaguwa nga listahan it  National Task Force to End Local Communist Armed Conflict  it 38 nga listahan it mga colleges ag universities sa bilog nga nasyon kun sa siin kaibahan kara ro ASU nga ginapabutyag nga puntirya nga maging recruitment ground it rebeldeng grupo.

Ro pagkaeakip it  ASU hay naging viral  sa social media ag humakot it nagkaeain-eain nga komento ag reaction eabi eon  ro mga estudyante ag graduate it nasambit nga eskwelahan.

Kaibahan man sa listahan halin sa Western Visayas ro West Visayas State University,  UP Visayas,  Central Philippine University, Filamer Christian University  ag Capiz State University.

Tuyo sigon it tikang makaron it  gobyerno nga matapos eon ro insurhensiya sa nasyon.