KALIBO, Aklan—Bilang pagpahaum sa ginaeauman nga pag-abot it COVID-19 vaccine sa nasyon, nagpaguwa eon it proposal si Pook Punong Barangay Ronald Marte ag Liga ng mga Barangay President Kalibo Chapter sa posibleng maging proseso sa pagtao it bakuna sa bilog nga banwa it Kalibo.
Suno kana nga plano nana nga magpatawag it pueong sa mga barangay kapitan sa masunod nga domingo agud nga matalakay ro vaccine roll-out.
Kaibahan man sa pagatumuron ro vaccination sites sa kada sitio ukon barangay nga may mabahoe nga area kapareho it mga covered court.
Sa pagahimuon nga vaccination program, target nanda nga maturukan ro mga una sa priority lists kapareho it mga frontliners sa barangay eabi eon ro mga BHERTs, tanod ag mga kagawad kamana man ro mga vulnerable sectors kapareho it mga senior citizens, mga may kapansanan ag iba pa.
Igaduso sigon ni kapitan marte sa mga kaparehong barangay kapitanes nga maghimo eon it listahan it mga iga-prayoridad.
Uman nana nga ginklaru nga bukon it pieilitan ro pagpabakuna rason nga may ginapahaum eon sanda nga waiver it mga haum nga magpaturok it bakuna.
Pila sa mga ginaplano nanda hay ro pagbutang it lamesa para sa mga nagapa-rehistro kun sa siin hay pagaboe-an anay sanda it vital signs.
Pagkatapos hay paga-usisaon kon owa it problema sa anang kundisyon antes nga maturukan.
Magataeana man sigon it holding area agud nga maobserbahan kon may epekto sa eawas ro bakuna.
Mag-eowas sa AstraZeneca, bukas man suno kana ro LGU-kalibo sa pagbaton it iba pang brand it bakuna kun sa siin nagtaeana sanda it P50 million pesos para sa pagbakae it COVID vaccine.
