KALIBO, Aklan—Mag-eowas sa swab test, nag-umpisa eon nga maggamit it saliva test ro Philippine Red Cross sa andang bag-ong bukas nga molecular laboratory sa Passi City sa probinsiya it Iloilo.
Raya ro ginkumpirma ni chapter administrator Mary Jo Galleon it PRC-Aklan.
Ro saliva test hay ro pagkolekta it eaway bilang specimen sample agud nga matumod kon naga-angkon it COVID-19 ro sangka tawo kun sa siin raya hay naga-agi man sa PCR machine.
Mas barato ag madali sigon raya nga pamaagi ag mas madasig nga magpaguwa it covid test result.
Kapareho it swab test hay mataas man ro anang accuracy rate.
Sa pihak nga parte, ginpahayag pa ni Galleon nga ro andang COVID-19 laboratory hay kompleto sa kagamitan ag makina nga makasarang nga mag test it kapin sa 2,000 nga swab specimens kada adlaw para sa reverse transcription–polymerase chain reaction ukon RT-PCR ag makapaguwa it resulta sa sueod it 24 oras.
Mag-eowas sa Iloilo, ro andang laboratory hay pwede man nga magbaton it specimens halin sa mga probinsiya it isla it panay agud nga maka-test it mas abu nga tawo ag mabuligan nga mapundo ro transmission it virus.
Ro saliva test hay pwede man sigon nga ma-cover it philHealth.
Gindugang pa ni Galleon nga ro tanan nga makikipag transaksyon sa andang laboratoryo hay kinahangean anay nga magpa-book online pinaagi sa website nga book.redcross1158.com para sa appointment.
Nagabaton man sigon sanda it walk-in , apang magahueat it schedule nga gintaeana para kimo.
