KALIBO, Aklan—Ginaduso makaron ni Kalibo Sangguniang Bayan member Augusto Tolentino ro paggamit it mga pasilidad it Department of Education ag simbahang katolika bilang covid 19 vaccination sites.
Suno kana nga daywang resolusyon ro anang ginhimo nga ginaeakipan it paghinyu sa deped aklan agud nga magamit ro andang mga classrooms ag auditorium kamana man kay Bishop Jose Corazon Talaoc sa paggamit it andang mga pasilidad para sa pagpatigayon it pagbakuna sa oras nga maging available eon raya sa banwa it Kalibo.
Delikado suno kana ro open area para sa vaccination program bangud sa mga posibilidad it pag-uea.
Nauna kara, gin engganyo man ni Tolentino ro 16 nga barangay captains sa kalibo nga magpahaum eon it listahan it mga posibleng recipient it bakuna.
Ginrekomenda man nana nga makaangkon it dry run para sa vaccination process.
Samtang, ginsuhestiyon man nana nga makaangkon it generator sets bilang preparasyon engkaso nga maduea-an it supply it kuryente sa andang storage facility sa brgy. tigayon agud nga malikawan ro pagkasamad it bakuna nga nagabalor it minilyong piso halin sa astrazeneca.
Madumduman nga ro LGU-Kalibo hay nagtaeana it inisyal nga P50-million pesos para sa pagbakae it Covid-19 vaccines para sa mga kalibonhon.
