National News——-Namatay eon si dating Sen. John Henry “Sonny” Osmeña ko Martes it hapon sa anang condominium unit sa syudad it Cebu sa edad nga 86.
Raya hay base sa kumpirmasyon it anang manghod nga si Annie Osmena-Aboitiz.
Sa makaron, uwa pa it pahayag ro pamilya Osmeña kon ano ro ginkamatay it dating Senador.
Insigida man nga ginpaidaeom sa cremation ro bangkay ni Osmeña.
Kon madumduman, nagpositibo si Osmeña sa coronavirus disease 2019 (COVID-19) ko Hulyo, apang gilayon man raya nga nakarekober.
Bilang miyembro it ikatlong henerasyon it kilaeang angkan it mga Osmeña sa Cebu, unang nagserbe bilang konsehal it Cebu City ag Vice Mayor ko dekada 60 ag ko ulihi hay nailihir sa Kamara de Representantes.
Si Osmeña hay kilaea man bilang Ten Outstanding Young Men ko 1970 ag sambilog sa mga naninahan kat bombahon ro Plaza Miranda ko 1971.
Nagdaog man raya bilang senador sa nasambit nga dag-on.
Matapos nga mag-exile sa Estados Unidos ag nagsukoe sa rehimen ni dating Pangueong Ferdinand Marcos, uman nga nailihir si Osmeña bilang senador ko 1987 ag 1992.
Nagbalik raya sa Cebu bilang representante it ikatlong distrito ko 1995 ag nagdaog it uman bilang senador ko 1998.
Sambilog sa mga laye nga ginsueat ni Osmeña ro Republic Act 7638, nga imaw ro nagtukod sa Department of Energy.
Nagserbe man imaw nga alkalde it syudad it Toledo halin 2013 hasta it 2019.
