KALIBO, Aklan—Uman nga naglunsar it programa para sa mga pamatan-on ro Kalibo Youth Development Council.
Suno kay Mr. John Marlou Salido, Youth Development Officer II it LGU-Kalibo nga tuyo kara nga mataw-an it kapital ro mga youth entrepreneur.
Suno kana, halin sa kabilugan nga 557 slot hay nagtaeana sanda it kapin sa 100 nga slot para sa mga pamatan-on nga naga-negosyo.
Raya suno kana hay kaparte it sustainable livelihood program it Department of Social Welfare and Development (DSWD).
Prayoridad sigon sa nasambitang program ro mga youth entrepreneur nga maghalin sa pamilya nga miyembro it 4Ps ag nakabaton it Social Amelioration Program (SAP) it gobyerno.
Target nandang magbuoe sa nagkaeain-eain nga sector it vendors sa Kalibo bilang benipisyaryo it programa agud makabulig sa andang paeangitan-an.
Sa makaron hay may una eon sandang kapin sa 400 nga inisyal recipient kung siin nakataeana pa rayang ipaidaeom sa validation.
Samtang, paga-istoryahan pa sa igapatigayun nga pueong it technicial working group sa masunod nga dominggo kung pila ro financial assistance nga igatao sa kada benipisyaryo.
