KALIBO, Aklan—Ginsuhestiyon ni Liga ng mga Barangay president Kalibo chapter ag Pook Punong Barangay Ronald Marte nga matutukan man ro pagtau it nagakaigo nga impormasyon sa mga residente nga nagaduda sa side effects it covid 19 vaccine.
Raya hay sa tunga it andang pagpahaum sa vaccination process sa oras nga mag-abot eon ro bakuna sa probinsiya it Aklan.
Kinahangean suno kana nga mataw-an it nagakaigo nga impormasyon ro publiko agud nga makapagdesisyon it tama.
Gin-abisuhan suno kana it Municipal Health Office ro mga midwifes it kada barangay nga i-eakip ro information dissemination partikular ro importansiya it bakuna sa pagpanupod it mga pormas nga ginapasueatan sa mga target nga recipient it bakuna.
Plano man nanda nga makaangkon it separadong listahan it mga 2nd priority agud nga engkaso nga indi magsipot ukon magmasakit ro recipient sa mismong adlaw it pagbakuna hay igatau raya sa mga naka-reserba agud nga indi mauyang.
Gusto sigon nanda nga syento porsiyento nga mabakunahan ro masobra sa 84,000 nga populasyon it banwa it kalibo, apang nakadepende kon pila ro maka-igo sa gintaeana nga pondo it LGU nga naga-abot sa haeos 50 milyon pesos.
Gindugang pa ni Kapitan Marte nga tuyo it bakuna nga matapna eon ro pagkalhit it deadly virus ag amat-amat eon nga makabalik sa normal nga pagpangabuhi.
Samtang, owa man suno kana it problema sa vaccination sites bangud haeos 90 porsiyento it mga barangay hay may covered court ag ro iba hay planong pagagamiton ro mga eskwelahan sa andang nasakupan.
Mabahoe man sigon ro naibulig it nagapadayun makaron nga pagbakuna it tipdas ag polio sa mga inunga sa barangay sa pagahimuon nga proseso it pagbakuna kontra sa covid-19.
