KALIBO, Aklan—Nakalista it pitong panibag-ong kaso it Coronavirus Disease 2019 ukon COVID-19 ro banwa it Banga.
Suno kay Ms. Donnalyn Siyambio, Public Information Officer it Lokal Inter-Agency Task Force it LGU-Banga nga ro lima sa pito nga bag-ong kaso hay close cotact it Case No. 45 kung siin ginakaeakipan raya ni Case No. 46 nga sangka 38-anyos nga eaeaki; Case No. 47 nga 13-anyos nga babaye; Case No. 48 nga 14-anyos nga eaeaki; Case No. 49 nga sangka 58-anyos nga babaye ag Case No. 50 nga sangka 58-anyos nga eaeaki.
Samtang, si Case No. 51 nga residente it Brgy. Linabuan Sur, Banga hay close contact mat-a ni Case No. 43 samtang si Case No. 52 hay sambilog sa mga miyembro it MDRRMO-Banga nga nagresponde sa aksidente nga nag-eontad sa Brgy. Torralba ko nagtaliwan nga adlaw it Biyernes, Pebrero 5.
Suno kay Siyambio ko gabi-i it Lunes nagguwa ro resulta it RT-PCR test it nasambitang mga persona kung siin insigida man sandang gindaea sa Ligtas COVID Center it banwa.
Samtang, makaron nga adlaw man suno kana nakataeana nga ipaidaeom sa swab test ro 19 nga indibidwal nga nailistang high risk contact it mga pasyente.
Kaangot kara, ro banwa it Banga hay nakalista eon it kabilugan nga 52 nga kaso it COVID-19 kung siin 13 pa ro aktibong kaso samtang 49 eon ro naka-recover.
