Kalibo Aklan——–Naninahan ro sangka sang dag-on nga ungang babaye ag daywang iba pa matapos nga matumba ro andang ginasakyan nga motorsiklo sa national highway nga sakop it Brgy. Tigayon , Kalibo.
Una eon sa mayad nga kahimtangan ro mga naninahan nga sa mayad nga swerte hay puro gasgas eamang ro andang naangkon sa nagkaeain-eain nga parte it eawas .
Kaibahan sa naninahan ro 29 anyos nga babayeng driver nga nagpamalibad eon nga magpamitlang it pangaean kaibahan ro anang sang dag-on nga ungang babaye ag 16 anyos nga igmanghud nga babaye nga imaw ro nagabitbit sa anang gumankon .
Base sa report, halin sa Brgy. Fulgencio Norte, Balete ro tatlo sakay it sangka neo nga motorsiklo ag magapa-uli eon kunta sa Brgy. Bakhaw Sur, Kalibo kat gulping may nagtabok nga sambilog pang motorista sa nasambit nga lugar .
Na-aeang-aeangan sigon ro driver sa pagpati nga mabungguan sanda rason nga naduea-an it kontrol sa ginamaneho nga motorsiklo ag natumba .
Nabuhian sigon it 16 anyos nga tiya ro anang gumankon rason nga inapok raya , apang sa mayad nga swerte hay owa masyadong naninahan .
Insigida man nga gindaea ro tatlo sa Aklan Provincial Hospital para sa nagakaigo nga medikasyon .
