KALIBO, Aklan—Pwedeng makaangkon it mas grabe pang implekasyon ag masakit sa kaeawasan ro sangka indibidwal nga kueang sa pag-alaga sa anang tagipusuon ukon “heart”.
Suno kay Ms. Mary Ruth Esmalla, Nurse it Provincial Health Office ukon PHO-Aklan nga posibleng magresulta sa sakit nga Hypertension ukon high blood pressure, heart in largement, stroke ag maabo pang iba ro simpleng pagpabaya sa ginabatyag nga problema sa tagipusuon.
Ro mga sintomas agud masayuran kung ro sangka tawo hay may sakit sa puso hay ro pagsakit it dughan, nalisdan nga magginhawa, gapangeuya ukon gapang-eamig sa pilang parte it kaewasan ag madasig ukon bukon it regular nga heartbeat.
Samtang, may una man sigon nga kaso nga owa naka-ekperyensiya it sintomas ro sangka pasyente.
Agud nga makalikaw sa nasambitan nga sakit dapat nga magtao it oras sa pag-ehersisyo, magkaon it masuntansiya nga pagkaon kapareho it prutas ag tinoean-on, likawan ro perming pagkaon it mga processed foods, pagpanigarilyo, ag sobra-sobra nga pag-inom it aeak.
Samtang, ro sin-o man nga may nabatyagan nga sintomas hay pweding magpacheck-up sa maeapit nga health center sa andang lugar agud gilayon nga maagapan ag mataw-an it nagakaigo nga bueong.
