Eaeaki sa India, ginpainom it tubi ro nauhaw nga cobra

Balita Espesyal—Sangka eaeaki sa India ro owa it kahadlok nga sumaklolo sa sangka cobra.

Sa pihak it peligro nga imaw hay maangkit it makamandag nga sawa, ginsaklolohan pa gihapon it forest service officer ro nauhaw nga cobra sa pamaagi it pagpainom kara it tubi.

Makita ro kaisog it owa eon ginpangaeanan nga eaeaki sa video nga ginpost sa social media.

Mapamantaw sa video kung paalin gin-eapit it eaeaki ro bote it tubi sa bibig it cobra.

Owa it pagduha-duha pa nga ginbuytan it eaeaki ro cobra para magkalma raya samtang gina-inom it sawa ro tubi halin sa bote.

Bangud sa malasakit nga ginpakita it eaeaki sa cobra, gilayon nga ginbutangan ro video it nagakabagay nga caption: “Love and water. Two best ingredients of life.”