KALIBO, Aklan—Maabu nga mga mangunguma sa Texas, USA ro apektado matapos nga nagkaeamatay ro andang pananum kasunod it haeos limang nga adlaw nga pagtama it snow storm nga nagtuga it grabeng kaeamig it paniempo.
Suno kay Bombo International Correspondent Rhodora Tonel Elizondo, tubong Brgy. Bacan, Banga, Aklan ag presenteng manugturo sa Mc Allen, Texas nga owa eon it masyadong gin-ani nga mga tinuea ro mga mangunguma partikular sa southern part it nasambit nga estado bangud sa makasaysayan nga bagyo.
Namatay ag nagkaea-eunot sigon ro mga tanum nga cauliflower, broccoli, cabbage, chard ag carrots matapos nga maputos it yelo.
Sa pihak nga parte, padayun nga nagaka-ubusan it mga baligya eabi eon ro gatas , itlog ag tinapay sa mga shopping center bangud sa pag-panic buying it mga residente.
Amat-amat eon suno kana nga nagabalik sa normal ro sitwasyun matapos nga nakaangkon eon it supply it kuryente ag tubi ro maabu nga mga residente sa Texas kasunod it pagtunaw it mga snow ag pagtaas eon it temperatura.
Nasayuran nga maabu nga mga tubo it tubi ro sumabog bangud sa sobrang eamig ag maabu nga mga generators sets ag tubo it natural gas nga ginaboe-an it kuryente ro nag-freeze man.
Ro Texas suno kana hay naga produce it masobra sa 4.5 million nga bariles it langis kada adlaw, apang maabu ro nag-shut down bangud sa winter storm.
Kaabuan sigon sa mga residente hay owa nakapahaum sa pagtama it snow storm bangud nga owa nanda ginaeauman nga maga-eawig raya it pilang adlaw.
Samtang, owa suno kana it Filipino nga naapektuhan it winter storm sa nasambit nga lugar.
Gina-monitor sigon nana ro sitwasyun it filipino community bilang chairman makaron it Philippine-American chamber of commerce.
