KALIBO, Aklan—Temporaryong ginpasarado umpisa ko Pebrero 25 “until further notice” ro main office it Aklan Electric Cooperative ukon Akelco sa banwa it Lezo para sa maeapnagon nga disinfection.
Ginpahayag ni Engr. Alexis Regalado, General Manager it Akelco nga raya hay matapos nga magpositibo ag namatay ko Pebrero 24 bangud sa cardiac arrest ag covid 19 ro sambilog sa andang empleyado nga may importanteng posisyon nga ginabuytan.
Suno pa kana nga indi pa sanda makadesisyon kon uman nga igabalik ro andang operasyon sa Marso 1, Lunes nga adlaw, bangud nga ginpaidaeum pa sa swab test ro tanan nga mga empleyado nga nakaangkon it close contact sa nagpositibo sa virus nga nag-abot tanan sa 32.
Bilang precautionary measure, ginpa-uli eagi suno kana ro tanan nga empleyado it engineering department kun sa siin naka-assign ro pasyente ag ginpahisayod ro hitabu sa andang natungdan nga mga municipal health unit para sa nagakaigo nga quarantine procedure.
Sa pihak kara, ginklaru ni engr Regalado nga nagapabilin nga bukas ro andang sub-office sa mga gustong magbayad it andang electric bills ag iba pang transaksyon kamana man nga 24 oras sa gihapon ro operasyon it andang maintenance deparment para sa pagserbisyo sa mga member-consumer-owners.
