KALIBO, Aklan—Ginaeuman eon it mga Airline companies ro pagtaas it numero it mga pasahero bangud sa nagahilapit nga kuwaresma ag summer season.
Suno kay Engr. Eusebio Monserate Jr, manager it Civil Aviation Authority of the Philippines ukon CAAP-Aklan nga raya hay mag-eowas pa nga ginhaeugaan eon ro mga travel requirements it national inter-agency task force.
Nasayuran nga sa idaeum it Resolution No. 101 it IATF, bukon eon it mandatory ro swab testing ag quarantine sa mga biyahero kamana man ro travel authority ag health certificate.
Sa kamatuoran suno kay Engr. Monserate nga ro Air Asia hay nagpaabot eon it abiso nga magadugang it andang scheduled flights umpisa makaron nga buean it Marso.
Sa makaron sigon hay may tig-daywang flights umpisa Lunes hasta it Sabado ag tatlong flights kada domingo sa Kalibo International Airport.
Umpisa Enero hasta Pebrero hay nakalista it kapin sa 2,500 nga incoming nga mga pasahero kada buean.
Ginpahayag dugang ni Engr. Monserate nga pilang Airlines companies ro nagahinyu sa Provincial IATF nga pasugtan eon nga magbaton it mga turista ro kalibo airport butang nga ginapahauman eon sigon nanda ro posibleng adjustments angot kara eabi pa ag ginapanan-aw ro pagbukas it Boracay sa mga foreign tourists.
