KALIBO, Aklan—Nagapati si Engr. Eusebio Monserate Jr., Manager it Civil Aviation Authority of the Philippines ukon CAAP-Aklan nga makabulig it mabahoe sa ekonomiya ro pag-angkon it unified travel protocols nga nagatuyo nga mas pang haeugaan ro mga proseso sa pagbiyahe sa sueod it nasyon.
Apang suno kana nga maskin nga ginhaeugaan dapat man gihapon nga hugut nga ipatuman ro mga minimum health protocols agud nga indi mabutang sa aeang-aeang ro ikamayad nga eawas it mga biyahero.
Pabor suno kana imaw sa proposisyon it IATF agud nga mataw-an eon it kahigayunan ro mga pumueuyu nga maka-uli sa andang natungdan nga probinsiya nga indi eon kinahangean nga maggastos it mabahoe partikular ro RT-PCR tests.
Apang, magasunod sigon sanda anuman ro magiging desisyon kara it Provincial IATF.
Nasayuran nga mag-eowas sa RT-PCR test, owa eon it ibang requirements kapareho it pagbo-oe it medical certificate halin sa Philippine National Police, affidavit of undertaking ag iba pa.
Kaabuan sa mga pasahero nga naga-agi sa kalibo airport hay ro mga LSI’s, APOR ag mga returning overseas Filipino workers.
Tiempo man suno kana ro paghaeuga para sa turismo.
Samtang, ginkalipay man ni Engr. Monserate ro pag promote kana it Central Office sa pagiging full-pledged airport manager nga naging epektibo ko Pebrero 17, 2021 apang nagpanumpa sigon imaw ko nagtaliwan nga adlaw eamang pinaagi sa virtual ceremony.
Raya hay nagapakita eamang sigon nga nataeupangdan it management ro anang pagtinguha ag dedikasyon sa trabaho sa sueod it haeos 24 anyos.
