Kalibo Aklan ——–Nagsaka pa sa kabilugang 763 ro numero it mga nagmayad halin sa sakit nga coronavirus disease (COVID-19) sa bilog nga probinsya it Aklan.
Base sa pinakaulihing datos it Aklan Provincial Epidemiology Surveillance Unit it Provincial Health Office (PHO), raya hay ginakaeakipan it tig-lima nga taga-Makato ag Numancia; 28 ro halin sa Kalibo; ap-at ro sa Libacao ag sambilog ro halin sa banwa it Malinao.
Apang sa pihak kara, nadugangan man it onse ro mga natamaan it deadly virus nga ginakaeakipan it pito maghalin sa banwa it Makato; daywa ro sa Malay ag tig-sambilog sa Banga ag Madalag.
Bangud kara, nagsaka pa sa kabilugang 943 ro mga natamaan it COVID-19 apang 150 eon lang ro nabilin nga aktibong kaso kon sa siin 134 ro presenteng una sa facility quarantine; 14 ro naka-admit sa hospital ag daywa ro naka-home quarantine.
Samtang, umabot eon man sa 30 ro namatay bangud sa nasambit nga deadly virus kasunod it sambilog nga panibag-ong nadugang sa listahan.
Sa pihak kara, padayon ro pagpadumdom it mga health authorities sa publiko nga magsunod sa ginapatuman nga minimum health safety and protocols agud nga makalikaw sa nasambit nga masakit.
