Kalibo Aklan ——–Nagpadumdom makaron ro Aklan Provincial Health Office (PHO) sa publiko nga maging responsableng tag-iya it mga kasapatan partikular ro mga dog owner.
Raya hay kasunod it Rabies awareness month nga ginselebrar sa kada buean it Marso.
Ginpaathag ni Ms. Debbie Villaflor Nurse IV, Rabies Program Provincial Coordinator it PHO- Aklan nga ro rabbies hay sangka makamaeatay nga sakit apang pwede raya nga maagapan.
Raya hay sangka viral disease nga nakakaapekto sa central nervous system it sangka tawo nga naangkit ayam.
Nagakalhit raya pinaagi sa pag-angkit it sapat, kaemot ag eaway nga may-unang impeksyon.
Kon naangkit it ayam ro sangka tawo, ro rabies nga una sa eaway kara hay magasueod sa nagkaeain-eain nga parte it eawas.
Samtang sa pihak parte, pwede sigon nga maagapan ro makamaeatay nga sakit kon magpakonsulta insigida sa pinakamaeapit nga doktor.
Apang antes kara, hugasan anay it tubi ag sabon ro lastro sa sueod it napueo hasta 15 minutos bilang paunang medikasyon.
Ginpahayag dugang ni Villaflor nga inde magpati sa naga-uso gihapon nga tandok bangud nga uwa it kamatuoran nga masuyop ro virus nga amat-amat eon nga nagakalhit sa eawas it tawo.
Maagapan eamang ro hinali nga kamatayon kon magpabakuna it anti-rabbies ag iba pang medikasyon nga igata-o it doktor.
