Kalibo Aklan ——–Hugot makaron nga ginaengganyo it mga eksperto ag health authority ro publiko nga magpabakuna kontra sa coronavirus disease (COVID-19).
Ginpaathag ni Dr. Aldrinne Fernandez it Libacao Municipal Health Office nga maskin anong klase it bakuna hay inde malikawan nga may adverse effect apang bukon it buot hambaeon kara hay delikado ro bakuna nga igaturok sa sangka inidibidwal.
Ginpasiguro kara nga nag-agi raya sa maid-id nga pagtuon it mga eksperto ag maabong tawo ro nagpaidaeom sa clinical trial.
Ro pahayag ni Dr. Fernandez hay sa tunga it mga pagduha-duha it mga pumueoyo kon magpabakuna sanda ukon inde.
Ginpahayag dugang nga raya eon sigon ro tamang kahigayunan nga magpabakuna ro mga pumueoyo agud nga amat-amat nga mabutang sa new normal ro komunidad.
Bukon man sigon it syento porsyento nga inde matamaan it deadly virus apang ro importante hay protektado eon ro eawas ag magiging mild eamang ro magiging tama kara partikular nga inde eon umabot sa punto nga daehon kapa sa hospital.
Si Dr. Fernandez hay sambilog sa mga naga-advocate angot sa importansya it bakuna ag haom raya unang mabakunahan sa oras nga maging available eon raya sa probinsya it Aklan.
