Kalibo Aklan——Naga-abot eon sa masobra sa 500 nga healthcare workers ro nabakunahan it Sinovac vaccine matapos nga mag-umpisa ro vaccine roll-out ko miyerkules nga adlaw, Marso 10.
Suno kay Dr. Leslie Ann Luces it Provincial Health Office (PHO)- Aklan nga eubus ro andang kalipay sa mataas nga turn-out it mga nagpabakuna.
Sa kamatuoran suno kana ko “day 1” hay nag-eampas pa sa andang target nga 200 ro natigayon nga mabakunahan nga umabot sa 278 nga puro tanan empleyado it Dr. Rafael S. Tumbukon Memorial Hospital ag mga consultants it nasambit nga ospital .
Sa pihak nga parte, gindugang pa ni Dr. Luces nga an-um nga mga healthcare workers ro nakaexperiensiya it side effects pagkatapos maturukan it COVID-19 vaccine .
Nakabatyag sigon ro pilang healthcare workers it pagmanhid ag pagsakit sa parte it butkon nga naturukan it bakuna.
Apang ginklaru kara nga raya hay mga minor ag common nga sintomas pagkatapos it pagpa-injection.
Sa pihak kara, kaabuan mat-a sa nabakunahan hay owa nagpakita it anuman nga sintomas it side effects
Samtang, gindugang pa ni Dr. Luces nga engkaso nga indi maubos ro gintaeana nga 2,420 vials it Sinovac vaccine sa Aklan sa gintaeana nga oras ukon hasta sa Marso 12 , biyernes nga adlaw hay haum sanda nga makaangkon it extension .
May nakapahaum sigon sanda nga substitution lists para sa mga mabilin nga bakuna.
Mag-eowas sa mga health care workers it DRSTMH hay may gin-allocate man nga bakuna para sa iba pang mga pampubliko ag pribadong ospital .
Kaibahan man kara ro mga empleyado it Rural Health Units (RHUs).
