KALIBO, Aklan–Preparado eon ro Kalibo International Airport sa pagbaton it mga COVID-19 vaccine nga maga-abot sa probinsya it Aklan.
Raya hay kasunod it ginpatigayun nga transportation and security simulation drill it lokal nga gobyerno it Kalibo agud nga masigurado ro kahauman antes ro aktwal nga pag-abot it mga bakuna.
Suno kay Civil Aviation Authority of the Philippines (CAAP)-Aklan Manager Engr. Eusebio Monserate Jr nga natumod eon nanda ro mga lugar nga paga-parkingan it mga behikulo ag tawo nga kaibahan sa convoy nga magasueang sa bakuna.
Ginhimo sigon nanda ro nasambit nga tikang agud masayuran it mas temprano ro mga bagay nga kinahang-ean pang ma-improbar.
Ro papel suno kana it paeuparan hay kun paalin masigurado nga makasueod ro mga behikulo maeapit sa eroplano ag ro mga euwas nga konsiderasyon agud mapadali ro pagdeliver it mga supply paadto sa cold chain storage sa N. Roldan St. Kalibo.
Sa makaron hay bukon pa sigon it klaro kung siin opisyal nga maga-agi ro paeaabuton nga bakuna.
