KALIBO, Aklan–Uman nga nagpangibabaw sa bilog nga kalibutan ro talento ag hinumuan it sangka Aklanon.
Gamit ro Aklan Piña hay naangkon it sangka Aklanon ro kadaeag-an pag-abot sa dekalidad nga pinya cloth kat makuhit ro Global Eco Artisans Award sa California nga ginpartisiparan it kapin sa 500 nga nasyon sa bilog nga kalibutan.
Ro Global Eco Artisan Awards 2021 hay sangka global competition nga organisado it AGAATI nga nagatuyong ipakilaea sa bilog kalibutan ro mano-mano nga hinimuan gamit ro tela ag luxe accessories.
Si Raquel Eliserio ro naging pambato it Pilipinas ag nag-uli it pinakamataas nga award.
Suno kana nga hasta makarun hay indi sa gihapon imaw makapati sa nabatun nga award, apang eubos ro anang kalipay nga naangkon raya matapos ro pilang buean nga preparasyon.
Bukon it madali ro proseso it paghimo it Pinya Cloth, una kara, hay pagaboe-on anay ro piña fiber maghalin sa dahon it pinya sa pamaagi sa pagkuskus kara.
Kung nabooe eun ro fiber hay pagaeabhan raya para pumuti ag ibuead sa adlaw.
Kung magmaea eun hay pagasudlayon raya ag tig sambilog nga pagasugpunon ag pagadisenyohan para sa pagburda nga ginahimo it mano-mano ukon pagagamitan it machine.
Nasayuran nga ro probinsya it Aklan hay kilaea sa paghimo it manami nga pinya cloth nga andang ginsupply sa nagkaeain eain nga lugar sa sueod ag guwa it nasyon.
Kamatuoran pa kara nga ro Aklan hay sambilog sa mga pinakamabahoe nga producer ag sentro it industriya it piña fiber ag cloth sa nasyon.
