KALIBO, Aklan–Naging makasaysayan ro ginpatigayun nga misa ag mensahe it Santo Papa sa St. Peter’s Basilica angot sa selebrasyon it ika-500 anyos it Kristiyanismo sa Pilipinas.
Suno kay Bombo International Correspondent Gerlie Ongoco it Rome, Italy nga maabo nga mga Filipino ro nagtambong sa Santos nga misa sa Vatican City sa bahin it Italya.
Bangud limitado eamang sa 100 ro mga tawong ginapasugtan nga magsueod hay nagbutang man it wide screen sa guwa it pasilidad para mataw-an it kahigayunan ro mga tumueo-o nga maka-atender it misa.
Antes ro selebrasyon hay may ginpanupod sigon nga mga ticket kung siin ro mga tawo nga nataw-an eamang kara ro nakasueod sa St. Peter’s Basilica.
Ro pinakatumatak sigon nga mensahe ni Pope Francis hay ro pag-engganyo kara sa pagtuo it kada tawo eabi eon sa mga Filipino nga ro pagpalangga it Diyos hay dakila.
Sa pihak nga parte, nakataeana man nga magdeklara hin-aga, adlaw it Lunes it red zone ukon lockdown sa pilang parte it Italy.
Raya hay matapos nga makalista it pagtaas sa mga kaso it COVID-19 infection sa nasambit nga nasyon.
Ginpahayag ni Bombo International Correspondent Gerlie Ongoco it Rome, Italy nga magabuhay ro lockdown it hasta daywang dominggo.
Bangud kara, temporaryo anay nga igasarado ro mga eskwelahan, restaurants ag musueam kamana man nga makaangkon it paghugot sa hueag it mga pumueoyo.
Ro Italy hay may kabilugan nga 3, 201, 838 nga kaso it COVID-19 kung siin naga-abot eon sa 2, 579, 896 ro mga naka-rekober samtang ro death toll hay 101, 881.
