KALIBO, Aklan–Ginpasaeamatan ni Pope Francis ro mga Filipino kadungan it selebrasyon it 500 years of Christianity sa Pilipinas makaron nga adlaw it Dominggo.
Raya hay kasunod it ginpatigayun nga misa sa Saint Peter’s Basilica sa Vatican City, Italy.
Suno kay Fr. Nikko Patrick Awatin it Diocese of Kalibo nga nalipay ro tanan nga kaparian sa naging mensahe it Santo Papa para sa mga Filipino.
Ro selebrasyon suno kana hay nagapatimaan nga palangga kita it Santo Papa ag importante kita sa kabilugan nga misyon it Simbahang Katolika bilang mga Filipino.
Ro 500 years nga pag-abot sigon it Kristiyanismo sa Pilipinas hay importante bangud raya ro tanda it pag-abot it pagtuo sa mga Filipinong Kristiyano.
Raya man suno kana ro kahigayunan nga mag-umpisa it uman it misyon sa masunod nga 500 years para sa kabilugan nga nasyong Pilipinas ag sa bilog nga kalibutan.
Makabig man sigon raya nga hangkat katun tanan nga mas pang ipaeapnaag ro pagtuo.
Pagkatapos it Santos nga misa hay nagpatigayun man it Angelus ro Santos Papa ag uman nga nagtao it anang mensahe.
Si Fr. Awatin nga tumandok it banwang Batan hay gin-ordenahan sa pagka-pari ko Nobyembre 2019 ag ginpadaea imaw sa Rome, Italy it Diocese para magtuon it missionary.
