KALIBO, Aklan–Ginkwestiyon it pilang sangguniang bayan members ro pagtaas it presyo it eugta nga planong bak-eon it lokal nga gobyerno it Kalibo nga paga-obrahon nga relocation site it mga vendors it Kalibo Public Market.
Suno kay Punong Barangay Ronald Marte it Pook kalibo ag liga ng mga barangay president kalibo chapter nga nakibot sanda matapos nga halin sa dating 9,000 pesos per square meters nga presyo hay naging 10,500 pesos per square meters eon sa haeos sang ektaryang eugta nga nahamtang sa brgy. Andagao, Kalibo.
Nakahimo eon sigon sanda it resolusyon angot kara nga nagatau it otoridad kay mayor emerson lachica nga makipag-negosasyon sa eugta sa ginkasugtan nga presyo kamana man nga nakaplastar eon sa development bank of the philippines ukon DBP ro pagagamitan it andang ginsudlan nga utang, kun sa siin kaeakip kara ro market construction.
Ginrason suno kana ni Kalibo Municipal Planning and Development Coordinator Engr. Marlo Villanueva nga nagtaas ro balor it eugta bangud sa mga kinahangean pa nga bayaran nga buwis ag ahente it eugta.
Posible suno kana nga ma-kwestiyon raya it Commission on Audit ukon COA partikular ro pag-angkon it ahent.
Plano it LGU-Kalibo nga obrahon nga tatlong panaegan ro tindahan nga may initial funding nga 300 million pesos.
Paga-umpisahan suno kana ro construction kara matapos nga ma-relocate ro mga vendors.
Madumduman nga ko setyembre 2019 hay nasunog ro haeos 80 porsiyento it dekada eon nga tindahan.
