KALIBO, Aklan—Ginakasubo it Aklan Public Employment Service Office (PESO) nga owa mapadayun ro andang pagtao it financial assistance sa mga Overseas Filipino Worker (OFW) nga benipisyaryo it Calamity assistance halin sa Overseas Workers Welfare Administration (OWWA).
Suno kay Aklan PESO manager Ms. Vivian Ruiz-Solano nga owa pa sanda it balita hasta sa makaron kung hin-uno mapadayun ro nasambit nga programa.
Suno kana, daywang beses pa eang sanda naka-release it kwarta partikular ko Pebrero ag Marso it nagtaliwan nga dag-on.
Apang, owa eon sigon raya nasundan pa tuga it pagpanaeasa it pandemya.
Dugang pa ni Solano nga makapilang beses eon sandang nagpadaea it sueat ag nagtawag sa OWWA regional office 6 apang owa gihapon it sabat.
Sa alima eon man sigon it representante it OWWA ro an-om ka mga kahon it papeles it mga benipisyaryo matapos nanda rayang bue-on ko Hunyo 24, 2020.
Nagaeaum man imaw nga maaksyunan eon raya it taeatapan agud mapadayun ro distribusyon.
Ginbulgar man ni Solano nga may alokasyon nga nakataeana para sa proyekto apang owa sigon imaw kasayod kung siin eon ro pondo ukon nakaangkon raya it re-alignment.
Kapin sa 1, 074 pa sigon nga mga indibidwal ro dapat maeakip sa proseso.
Ro natungdan nga bulig pinansyal hay ginatao it OWWA sa mga OFW nga naapektuhan it bagyong Ursula ko nagtaliwan nga Disyembre 2019.
