KALIBO, Aklan–Amat-amat eon nga nagataas ro numero it mga indibidwal nga gustong magpabakuna kontra COVID-19.
Suno kay Liga ng mga barangay president ag Pook punong barangay Ronald Marte nga ginakalipay nana ro manami nga turn out it nagapadayun nga COVID-19 vaccination barangay dialogue sa pagpaguna it lokal nga gobyerno it Kalibo.
Mabahoe suno kana ro naibulig kara sa pag-engganyo it mga pumueoyo nga magpaturok it bakuna ag pagtao it nagakaigo nga kasayuran kamana man sa benipisyo nga daea sa ikaayong eawas it pagpabakuna.
Ginahimo sigon nanda raya sa tagsa-tagsa ka mga barangay it Kalibo.
Suno kay Marte, target nanda nga mabakunahan ro 70 porsyento it populasyon it Kalibo sa oras nga mag-abot eon ro vaccine supply.
Nagtao man sigon it dugang nga kumpiyansa sa mga pumueoyo ro pag-umpisa it vaccination rollout it gobyerno sa mga medical frontliner ag healthcare worker sa bilog nga nasyon.
Angot kara, ginapangayo man ni Marte ro kooperasyon it kada isaea nga makibuylog sa pagsukoe kontra sa pagkalhit it pandemya.
Kaeakip eon kara padayun nga pagsunod sa ginapatuman nga miminum health protocols agud indi eon madugangan pa ro numero it mga nailistang kaso it COVID-19 infection.
