KALIBO, Aklan–Handom eamang it sangka manug-uli ukon manugbueong sa Brgy. Mangan, Banga nga makabulig sa anang isigkatawo.
Suno sa 88-anyos nga si nanay Pering nga masobra tatlong dekado eon imaw nga nagabueong sa anang mga kasimaryo ag iba pang lugar.
Suno kana nga ginbuligan imaw it sangka mataas nga manugbueong para magkantiguhan sa raya nga patag kat sang beses nga nagpabueong imaw sa natungdan nga persona.
Nagsaeap eamang sigon imaw it kapareho nga gahum para makabulig sa mga nagakinahang-ean.
Antes raya, gintur-an anay sigon imaw nga magpangamuyo it Latin, bisaya ag iba pang linggwahe nga ginagamit sa pagbueong.
Kamana man nga gintaw-an imaw it sangka panig it papel kun siin idto nakasueat ro pangamuyo sa Latin para anang maging gabay hasta sa imaw hay magkantigo ag anang makabisado.
Kaeabanan sigon sa mga nagadangop kana hay mga indibidwal nga naka-experiensya it sakit sa taeon, ginkailaan it engkanto ag ginamalitan it maeain nga elemento.
May kaangtanan kara, ro itlog it manok suno kana ro anang ginagamit sa pag-uli kun siin ginapahid nana raya sa dahi ag eawas it sangka katawo samtang ginapangamuyuan.
Pagkatapos kara hay ana eon nga pagabanyosan it eana.
