KALIBO, Aklan—Bangud sa katuyuan nga mai-promote ro pilang ka mga manami nga lugar sa andang banwa, nadiskubre it sangka grupo it mga teacher-mountaineer ro mga unexplored waterfalls sa Brgy. Dalagsaan, Libacao.
Ro grupong “Team Tukad” nga ginakaeakipan it 10 ka mga miyembro kaibahan eun sanday Lady Lee Florencio, Benedick Zaspa, Noralyn Colas nga imaw ro nakatukib it mga waterfalls maeapit sa Mt. Kinayay, Igpako Creek ag raya hay ro Digahob Falls, Kabarangkalan Falls, Surabot Falls ag Sapang Bahoe Falls.
Sa interbyu iy Bombo Radyo, ginpahayag ni Noralyn Colas, bilang sangka nature lover hay nakahiligan eun nanda nga magsaka ukon magtukad it bukid bangud raya ro andang pamaagi agud nga makapag-relax ag makapag-unwind.
Nag-abot man sa tatlong adlaw ag daywang gabi-e ro andang pagsaka it bukid.
Samtang, ginpahayag man it manugturo nga si Benedick Zaspa it Brgy. Calamcan, Libacao nga bukon eun it bag-o kana ro andang na-eksperyensiyahan bangud unga pa eamang raya hay nakahiligan eun nana nga magsunod sa pagpano-eo sa sapa, ag magsaka it mga bukid.
Antes ro andang madinaeag-on nga pagsaka sa bukid it Barangay Dalagsaan, Libacao, ro indi na sigon malipat-lipatan hay ro anang kauna-unahang pagsaka sa bukid sa Mt. Napolak sa Ibarras, Iloilo.
Sa pihak nga parte, ginpahayag man ni Lady Lee Florencio it Brgy. Poblacion, Libacao nga ro anang pagkahilig sa pagsaka it bukid hay bangud eun man sa impluwensiya it anang ama nga nagatrabaho bilang guide sa Mt. Sipit Ulan sa Rizal.
Idto man sigon imaw una nga nakasaka it bukid kaibahan ro anang ama, igmanghod ag mga gumankon.
