KALIBO, Aklan—Balik eon sa normal ro biyahe it mga RoRo vessel ag motorbanca sa Aklan partikular sa Caticlan ag isla it Boracay.
Raya hay matapos nga ginbawi eon it mga opisyales sa Western Visayas ro temporaryong pagbawae sa mga biyahero halin sa Metro Manila; Bulacan, Cavite, Laguna, ag mga probinsiya it Rizal kamana man sa mga siyudad it Cebu ag Davao agud nga malikawan ro mas pang pagkalhit it COVID-19.
Suno kay Chief Petty Officer Jackie Lou Ang it Philippine Coast Guard (PCG) Aklan nga regular eon ro mga biyahe it roro vessel halin sa caticlan jetty port paagto sa batangas port vice versa.
Gindugang pa kara nga ro biyahe makaron it mga motorbanca patabok sa isla it Boracay hay temporaryong ginsaylo sa tabon port paagto sa sambiray port bangud sa mabaskog nga hangin ag humbak nga epekto it bagyong Bising.
Gindugang pa ni Ang nga kabulig sanda sa pagbantay sa mga pasahero ag sa operasyon it mga sea vessels agud nga masiguro nga ginasunod ro ginapatuman nga health and safety protocols it department of health partikular ro physical distancing, pagsuksok it face mask ag face shield , pirmeng pag disinfect it alima ag 50 porsiyento nga seating capacity it mga saeakyang pangdagat.
Gin-abisuhan man it PCG ro mga pasahero nga antes ro naka schedule nga biyahe hay i-check kon ha-comply ro tanan nga mga requirements agud nga indi maperwisyo ro pamanawon.
Sa mga turistang nagasueod sa boracay, importanteng may bitbit nga online health declaration card para sa QR code, government issued ID, negatibong COVID-19 test results halin sa mga lisensiyadong laboratoryo 72 oras antes ro andang biyahe.
Samtang sa mga umaeagi nga pasahero ukon naga-agi eamamg sa aklan sa parehong inbound ukon outbound travelers, obligado sanda nga mag presentar it health declaration card, S-Pass Travel, coordination certificate sa lugar nga andang paga agtunan ag valid ID.
Sa pihak nga parte, sa mga aklanon nga nagbiyahe paguwa it Aklan, kinahangean nga makabalik eagi sanda sa sueod it pitong adlaw, health declaration card, valid ID ag travel details ukon round trip ticket.
