KALIBO, Aklan—Kasunod it selebrasyon it National Earth Month, nagpatigayon it clean up drive ag tree planting activity ro Pulong Kabataan, sangka organisasyon it mga pamatan-on nga nagatuyong makabulig sa pag-preserba it palibot.
Suno kay Janica Dela Peña it grupong Pulong Kabataan nga nakatipon sanda it kapin sa 300 nga sako it basura sa ginhimo nga aktibidad sa Andagao Beach.
Ka-partner man kara ro Kalibo PNP, BFP, Philippine Coast Guard ag ro sangguniang kabataan sa banwa it Kalibo.
Apang bangud man sa pagsunod sa ginapatuman nga protocol agud magapabilin nga euwas sa paeag it COVID-19 pandemic hay nagwatak-watak eun lang ro andang grupo.
Ginkasugtanan eun lang sigon nga ro kada miyembro hay maglimpyo sa andang lugar.
Samtang, ginpahayag pa kara nga ro mga natipon nga basura hay andang gina-asses ag kung ano ro pinaka top nga basura hay igapresenta sa Sangguniang Bayan ukon SB-Kalibo ag sa Department of environment and natural Resources (DENR) agud makahimo it tikang agud nga mabawasan ro pagkalhit it mga basura sa palibot.
Samtang ginhingyo man ni Merlyn Aburca it Provincial Environment and Natural Resources (PENRO-Aklan) ro publiko nga haeongan ro palibot.
Suno kana nga nagakadapat eamang nga antigo ro kada pomoeuyo nga maglimpyo it mga suba ag creeks.
Ginpasaematan man kara ro grupo it Pulong Kabataan sa ginahimo nga inisyatibo agud nga makabulig para ma-preserve ro atun nga Mother Earth.
