KALIBO, Aklan—Nagpaabot it reklamo sa Bombo Radyo ro mga drivers ag operators it Public Utility Vehicles ukon PUV nga biyaheng Banga-Kalibo bangud sa gina-alegar nga pagpang-agaw it pasahero it mga tricycle nga nagabiyaheng Poblacion, Kalibo.
Suno kay Leandro Lenciano, Chairman it nasambit nga transport group nga klaru nga raya hay sangka pag-eabag sa “out of line” nga patakaran.
Ro sistema sigon hay ginakontrata it mga drivers ro andang mga pasahero nga nagapahatud sa terminal nga arkilahon lang ro andang mga tricycle paagto sa andang destinasyon.
Bangud kara, nagakaduea-an sanda it pasahero bangud sa pagsulot it mga tricycle drivers.
Bangud nga mabuhay eon ro nasambit nga kalakara, pilang petisyon eon sigon ro andang ginpasaka sa sangguniang bayan it banga, kapulisan, highway patrol group ag land transportation office ukon LTO apang owa pa it nagakaigo nga aksyon.
Nagakabaeaka ro opisyal nga kon indi matapna hay posibleng magtuga it kinagamo.
