KALIBO, Aklan—Preparado eon ro Public Employment Service Office (PESO)-Aklan sa pag-abot it daywang ka mga Deputy Administrator it Overseas Workers Welfare Administration (OWWA) hin-aga adlaw it Miyerkules, Abril 28, 2021.
Suno kay Ms. Vivian Ruiz-Solano, manager it PESO-Aklan nga mismong sanday OWWA Deputy Administrators Esther Margaux “Mocha” J. Uson ag Faustino L. Sabarez III kamana man si OWWA Regional Office OIC, Rizza Joy M. Moldes ro magapanguna sa pag-release it tseke sa mga Aklanon Overseas Filipino Workers (OFWs) nga naeakip sa programa it ahensya.
Suno kana, may kabilugang 24 nga mga OFW ro benepisyaryo it Balik-Pinas, Balik-Hanap buhay.
Raya sigon hay ro mga OFW nga owa eon nakabalik sa andang trabaho sa ibang nasyon bangud sa pilang ka mga rason.
Ginklaro man kara nga dapat ro mismong benepisyaryo ro magbuoe it cash assistance.
22 sa mga raya hay magabaton it tig P20,000 samtang ro daywa hay magabaton it tig P10,000.
Mag-eowas kara, may ginatanyag man sanda nga tseke para sa Educational Assistance para sa mga unga it namatay nga OFW.
Gindugang pa ni Solano nga may bag-ong kategorya nga ginlunsar ro OWWA pinaagi sa “Project Alalay sa Pag-aaral” kun sa siin may pito ka mga estudyante sa probinsya it Aklan ro sarang makabaton it tig P20,000.
Ginlaygayan man kara ro mga natungdan nga benepisyaryo nga mag-adto it mas temprano sa venue para sa pag-ayos it listahan.
Ro programa hay maga-umpisa pasado alas-2 it hapon sa lobby it Capitol main building.
Sa pihak nga parte, may iga-release man nga pondo ro Department of Labor and Employment (DOLE) para mga benepisyaryo it TUPAD program.
Ginpahayag ni Solano nga ro banwa it New Washington ro una kara nga makabaton.
Ginabuebanta nga kapin sa 436 ka mga fisher folks it New Washington ro benepisyaryo it programa.
Raya hay may pondo nga naga-abot sa P1.9 million halin kay Senador Joel Villanueva.
