KALIBO, Aklan—Ginpasiguro it Sangguniang Bayan it Kalibo nga pagataw-an nanda it atensyon ro reklamo it mga drivers ag operators it Public Utility Vehicle ukon PUV nga nagabiyahe sa eastern side it probinsiya may kaangtanan sa pag-eabag sa ‘out of line’ it mga nagabiyaheng Poblacion, Kalibo nga tricycle.
Apang suno kay Kalibo SB member Matt Aaron Guzman, chairman it committee on transportation nga mas mayad nga ipatawag ro iba pang banwa nga concern ag transport group ukon cooperative agud nga matalakay ro nasambit nga isyu nga pagapangunahan it Land Transportation Office ukon LTO-Aklan.
Sa kamatuoran suno kana nga mabuhay eon raya nga problema , kun sa siin ko nagtaliwan nga mga dinag-on hay nag-atubang man sanda it ibang LGU it western side partikular ro taga banwa it Numancia bangud sa gina-alegar nga pagsulot it mga pasahero.
Nauna eon nga nagpaabot it reklamo sa bombo radyo ro transport group nga biyaheng banga-kalibo bangud imbes nga daehon sigon sa andang terminal hay gina-kontrata it mga tricycle drivers ro andang pasahero nga arkilahon lang sanda eabi eon kon maabu ro andang karga.
Angot kara, nag apela si SB member Guzman nga imbes nga magsulutan hay magbueuligan eon lang eabi pa makaron nga tiempo it pandemya kun sa siin haeos apektado ro tanan.
Nasayuran nga nagareklamo man ro mga PUV drivers ag operators it Altavas ag Balete bangud sa gina-alegar nga pagpang-agaw it andang mga pasahero it mga nagabiyaheng colorum nga van.
Ginpaathag ni Guzman nga kon nagaguwa sa anang ruta ro sangka pampublikong saeakyan, klaru raya nga pag-eabag sa laye bangud sa violation kara nga out of line.
Sambilog sigon raya nga kampanyang hugut nga ginapatuman it LTO ag highway patrol group ukon HPG para sa kaeowasan it mga pasaherong nagabiyahe.
Pila eon man suno kana ro natigayon kara nga madakpan ag mamultahan nga mga drivers it LTO ag HPG.
