KALIBO, Aklan—Pagatun-an pa it Sangguniang Panlalawigan kon nagakabagay ro ginaproponer it Sangguniang Bayan it Kalibo nga obrahon nga relocation site it mga vendors ro kahabaon it Toting Reyes St. sa kilid it Kalibo Public Market samtang nagapadayun ro contruction it bag-ong building.
Suno kay Board Member Nemesio Neron, makaron hay ginatutukan it gobyerno ro paglimpyo sa mga sabeag sa kilid it karsada base sa mandu it Department of Interior and Local Government (DILG).
Posible suno kana nga makadisturbo raya sa mga motorista ag iba pang mga residente sa nasambit nga lugar, kun sa siin ginatantiya nga abuton it daywa hasta tatlong dag-on ro contruction.
Plano kara nga ipasarado ro halin sa kanto it Roxas Avenue hasta sa corner Quimpo St. kalibo.
Madumduman nga ro resolusyon angot sa nasambit nga hinyu nga gin-author si pook barangay captain ag liga ng mga barangay president kalibo chapter Ronald marte hay gintalakay ko martes nga adlaw it tatlong komitiba it provincial board nga ginaeakipan it committee on transportation and communication, committee on infrastructure ag committee on laws.
Engkaso nga pasugtan, kinahangean raya nga maobrahan it ordinansa.
Samtang, nagpanindugan man si Board Member Atty. Harry Sucgang nga sa nasambit nga isyu, dapat kalipatan ro mga pagduda ag pulitika.
Raya hay bangud nga ginabaeabagan sigon it sangguniang bayan ro ginabakae nga eugta it LGU-Kalibo sa parte it Judge Martelino St. sa Brgy. Andagao, Kalibo nga pagapatindugan it temporary relocation site para sa mga vendors.
