Kalibo Aklan ——-Nagapadayun ro operasyon it Pantawid Pamilyang Pilipino Program (4P’s).
Raya hay sa pihak it ginapangatubang nga pandemya it bilog nga kalibutan tuga it padayun nga pag-eapta it makamaeatay nga sakit nga coronavirus disease 2019 (COVID-19).
Suno kay Social Welfare Officer 111 Stephen Suajico it Department of Social Welfare and Development (DSWD-Aklan) nga nagapadayun ro andang programa sandig sa ginapatuman nga protocol it tagsa ka mga Local Government Unit (LGU).
Sa makarun hay may mga ginbag-o eamang sa nakagawian nga hilikuton, kapareho it ginapatigayon nga Family Development Session kung sa siin makarun hay ginabawaean eun ro face to face discussion it mga field staff sa mga benipisraryo.
Bangud kara, naga-isyu eamang sanda it module .
Samtang sa mga estudyante hay ro monitoring school eun lang ro maga-assess sa performance it sangka unga.
Samtang ginapahayag dugang ni Suajico nga makarun hay aprubado eun bilang sangka layi ro 4P’s.
Bangud kara, hay nagtaas man ro cash grant nga mabatun it mga benipisyaryo.
Para sa may mga unga nga una sa senior high school hay magabatun eun raya it 700 pesos maghalin sa dating 500 pesos.
Samtang ro una sa elementary level hay 300 ag ro sa high school hasta junior high school hay 500 pesos.
Nagtaas man sa 750 pesos ro kada buean nga health grant.
Samtang, uman man rayang nagpadumdom sa mga benepisraryo nga hugot nga likawan ro pagprenda it andang ATM.
Raya hay hugot nga ginabawaean sigon sandig sa layi ag engkasong madakpan hay pwedeng makakas ag indi eun makabatun it assistance sa nasambitan nga programa it gobyerno.
