KALIBO, Aklan—Owa nagapa-apekto si dating Kalibo Mayor William Lachica sa pagkadaeahig sa anang pangaean sa gina-alegar nga black propaganda nga nagahambae nga kaibahan imaw sa mga nagakunchabo agud nga makapanakaw sa pondo it igabakae nga lote it LGU-Kalibo sa barangay Andagao, Kalibo para sa relocation site it mga vendors it Kalibo Public Market.
Kaibahan ni Lachica sa ginpakalhit nga open letter ro anang manghud nga si Kalibo Mayor Emerson Lachica ag Sangguniang Bayan member Augusto Tolentino.
Naeakot pa maskin ro asawa ag unga ni Mayor Emerson.
Suno kana nga owa imaw it ideya sa nasambit nga sueat ag owa pa nana raya nakita ukon nabasa.
Apang nagapati imaw nga ro ginasugid nga black propaganda hay owa it kamatuoran.
Nangawa sigon imaw nga nadaeahig ro anang pangaean maskin nga owa eon imaw sa munisipyo ag malimpyo ro anang record sa pagtapos it anang termino eabi eon sa isyu it korapsyon.
Posible suno kana nga raya hay sangka politically motivated bangud sa anang pagdeklara nga magapadaeagan bilang gobernador sa maabot nga 2022 national and local elections.
Gindugang pa kara nga ro black propaganda hay kaeabanan nga nagakatabu eabi eon sa tiempo it eleksyon rason nga ginlaygayan nana ro mga pumueuyu nga maging mausisa sa pagkilatis kon ro mga akusasyon sa sin-o man nga kandidato hay matuod ukon fabricated.
Nagakabaeaka man si Lachica nga posibleng gamiton raya nga instrumento agud nga samaran ro mga kandidatong mabaskog ro hatak sa publiko.
Sa makaron hay sigidas sigon ro andang paglibot sa nagkaeain-eain nga parte it aklan kaibahan ro anang ka-tandem nga si Board member Atty. Nolly Sodusta agud nga mabo-oe ro pulso it publiko.
