KALIBO, Aklan—Viral makarun sa social media ro prenup shoot it mag-couple nga si Genelyn Pancito ag Jomel Solis matapos nga gamiton bilang inspirasyon ro mga eksena sa sikat nga Korean Drama nga “Crash Landing on You”.
Aminado ro bride ag soon to be wife nga si Pancito nga dati pa hay nakahiligan eun nanang magpamantaw it mga Korean Drama bilang pampaduea it stress kung night shift sa duty bilang sangka nurse sa banwa it Buruanga.
Bangud kara anang gin-open sa anang groom nga andang pagasundon sa photoshoot ro konsepto it sikat nga Korean drama kung sa siin owa man ginpamaeabagan it anang soon to be husband.
Kapareho sa mga eksena, owa naging madali ro relasyon it daywa.
Maabong mga naging balakid ag dugang pa nga una sanda sa Long Distance Relationship ukon LDR matapos nga ginpaeayo it andang mga responsibilidad ag trabaho.
Nasayuran nga ro bride hay naga-istar sa banwa it Buruanga sa probinsya it Aklan samtang ro groom hay nagatrabaho sa Bureau of Jail Management and Penology (BJMP) sa siyudad it Iloilo.
Samtang, antes man nga naangkon it groom nga si Jomel Solis ro matam-is nga “YES” it anang bride hay nakalimang beses man rayang napaseawan sa anang proposal sa long time girlfriend.
Nagkakilaea ro daywa umpisa kat nagatuon pa eamang sa kolehiyo ag naging magkarelasyon sa sueod it 10 anyos ukon sangka dekada.
Sa makarun hay plano it daywa nga magpakasae sa petsa 24 it Mayo, dag-on 2021 nga nakataeanang pagahiwaton sa banwa it Buruanga.
