KALIBO, Aklan—Aminado ro Philippine Statistics Authority (PSA-Aklan) nga nakaangkon it technical problem ro andang website sa unang adlaw it online registration para sa National ID ko adlaw it byernes, Abril 30.
Sa pihak kara, ginpahayag ni Peter Mangilog it PSA-Aklan nga sa makarun hay maayos eun ro andang portal ag pwede eun nga mag-register it uman ro mga pumoeuyong Aklanon.
Pagklaro pa kara nga medyo nagloading ro andang portal ko mga nagtaliwan nga adlaw bangud sa sigon hay maabo ro nagagamit ag gustong magparegister.
Madumduman nga una eun nga ginpahayag it National Economic and Development Authority nga ro online system hay magakolekta it demographic information sa mga aplikante para sa National ID.
Dag-on 2018 kat ginpermahan ni Pangueong Rodrigo Duterte nga maging laye eun ro National ID System agud himuon nga sambilog eamang ro mga government IDs.
Una kara, ginreport man it Department of the Interior and Local Government (DILG) nga may masobra 30 probinsiya ro una sa prayoridad sa rollout para sa Philippine Identification System.
