KALIBO, Aklan—Mas ginpii ni Buruanga Mayor Concepcion Labindao it nga magpabakuna eun lang sa andang banwa sa pihak nga raya kunta hay nakataeana nga bakunahan kaibahan ro pilang ka mga mayor ag ro mismong gobernador sa probinsya.
Suno kay Mayor Labindao nga kahapon nga adlaw hay natigayon eun imaw nga maturukan it Sinovac vaccine kaibahan ro 41 nga iba pa nga una sa andang A1 priority list.
Nauna eun nga nagpatigayon it andang first roll out ro nasambitan nga banwa ko abril 20 ag kapin sa 63 doses it COVID-19 vaccine ro naiturok.
Kaibahan pa kahapon sa mga naturokan it bakuna ro mga miyembro it Barangay Health and Emergency Response Team (BHERT’s), Punong barangay, barangay kagawad ag barangay Tanod, committee on health, Barangay Health Worker ( BHW) ag ro mga personnel it Bureau of Fire and Protection (BFP).
Kadungan man kara, anang ginkangay ro mga pomoeuyo it banwa nga magpabakuna kontra sa covid-19 agud nga maabot ro 70percent nga herd immunity.
Sa makarun hay may unang tatlong panibag-ong kaso it covid-19 ro banwa it Buruanga.
Raya hay maghalin sa sangka pamilya eamang ag presente eun nga gin-isolate samtang ro nagapatigayon man it contact tracing agud matumod ro mga nakasalamuha it mga nasambitan nga pasyente.
