KALIBO, Aklan—Naturukan eon it Sinovac COVID-19 vaccine si Aklan Vice Governor Reynaldo “Boy” Quimpo kaibahan ro pilang Sangguniang Panlalawigan member ko adlaw it Huwebes, Mayo 06 sa ABL Sports and Cultural Complex sa Brgy. Estancia, Kalibo.
Kaibahan sa mga nagbaton it unang dose it bakuna si SP member Atty. Harry Sucgang, SP member Ramon Gelito, SP member Nemesio Neron, SP member Nelson Sta. Maria ag SP member Esel Flores.
Suno sa bise-gobernador nga raya ro unang vaccination rollout para sa A2 category kun sa siin puro mga senior citizen nga Sangguniang Panlalawigan member ro ginbakunahan.
Owa man sigon it nabatyagan nga adverse effect ro opisyal matapos kara nga mabaton ro bakuna.
Gina-engganyo man kara ro publiko eabi eon ro mga senior citizen ag may mga comorbidities nga magpabakuna kontra COVID-19 sa oras nga maging available eon ro bakuna para makaangkon it dugang nga proteksyon sa eawas.
Samtang, nakataeana man sandang magbaton it 2nd dose it Sinovac vaccine sa Hunyo 3.
Madumduman nga nauna eon nga nagpabakuna ro pilang alkalde it Aklan ko nagtaliwan nga dominggo matapos nga rebisahon it Inter-Agency Task Force (IATF) ro andang polisiya ag pasugtan nga maturukan ro mga alkalde ag gobernador nga ginakabig nga high risk individuals.
