KALIBO, Aklan—Kinahang-ean nga ma-relocate anay ro mga vendors sa Kalibo Public Market antes umpisahan ro konstruksyon it bag-ong tindahan.
Raya ro ginpahayag ni Engr. Alejandro Ventilacion, District Engineer it Department of Public Works and Highways (DPWH)-Aklan sa interview it Bombo Radyo Kalibo.
Suno kana, dapat ko nagtaliwan nga Nobyembre 2020 pa nag-umpisa ro pag-repair sa tindahan apang owa raya mahueag bangud sa pilang ka mga isyu partikular ro relocation site it mga vendors.
Base sa inisyal nanda nga pag-istorya ni Kalibo Mayor Emerson Lachica nagaguwa nga hasta makaron hay malabo pang makaangkon it lugar nga pagahalinan it mga manugbaligya.
Ginpahayag pa ni Engr. Ventilacion nga ro pondo hay dapat ma-disburse hasta sa buean it Disyembre.
Naistoryahan eon man sigon nanda ni Mayor Lachica nga temporaryong ibalik ro pondo sa national treasury hasta sa makaangkon eon it relocation site.
Base sa record it taeatapan, naga-abot sa P55 million ro buyot nandang alokasyon para sa rehabilitasyon it Kalibo Public Market.
