KALIBO, Aklan—Ginkumpirma it Municipal Inter-Agency Task Force it banwa it Banga nga owa pa sanda naka-umpisa it andang vaccination rollout kontra COVID-19 para sa mga A1 groups.
Suno kay Donnalyn Siyambiyo, tagapaghambae it MIATF-Banga nga kinahangean pa nanda nga kompletuhon ro mga kinahangeanon nga gamit para sa andang inoculation.
Mabahoe suno kana ro andang vaccination area sa teodosio’s park and cultural complex apang ro problema hay mainit sa sueod ag owa it nagakaigo nga ventilation.
Bangud nga haeos daywang beses eon nga ginpakansela nanda ro alokasyon nga bakuna halin sa Provincial Government hay gin-refer lang anay nanda ro 50 sa andang A1 groups sa nagapadayun nga mass vaccination it provincial government ko Lunes nga adlaw sa ABL Sports and Cultural Complex.
Kaabuan sa mga raya hay tawuhan it department of social welfare and development ukon DSWD, mga BHERTs ag iba pang mga opisyal ag empleyado nga may kaangtanan sa ikamayad nga eawas.
Target sigon nanda sa banwa it banga ro masobra sa 400 nga mga recepients it A1 groups kun sa siin sa makaron hay padayun ro andang pag engganyo sa mga raya nga magpabakuna sa libreng vaccination program.
Nasayuran nga ro banwa eon lang it banga sa 17 nga banwa sa Aklan ro owa pa nakapatigayon it andang vaccination rollout.
Samtang, sa makaron ro banwa it banga hay may bag-ong 15 nga aktibong kaso, kun sa siin, 9 kara ro naka quarantine facility ag ro 6 hay naka home quarantine.
