KALIBO, Aklan—Hugot makaron ro ginapatigayun nga monitoring it Municipal Inter-Agency Task Force it banwang Banga matapos nga madugangan ro kaso it Coronavirus Disease 2019 ukon COVID-19 sa andang banwa.
Suno kay Donnalyn Siyambio, tagapaghambae it MIATF-Banga nga bumunae eon sa 150 ro kabilugang kaso it sakit sa nasambit nga banwa matapos nga madugangan it 12 nga panibag-ong nagpositibo.
Kaabuan sigon sa mga pasyente hay high risk contact it andang pamilya nga nauna eon nga nagpositibo sa deadly virus ag ro iba hay nakaagkon it exposure sa ibang munisipalidad.
Ginkumpirma man ni Siyambio nga may sangka opisyal it barangay ag health worker nga nagpositibo sa virus.
Suno kana, ko adlaw it Miyerkules hay ginbue-an sanda it swab test sa Banga Rural Health Center.
Sa mayad nga swerte hay puro sanda nagnegatibo.
Samtang, ko adlaw it Huwebes mat-a ginbue-an it swab sample ro 26 nga high risk contacts it mga COVID-19 patient ag ginahueat pa ro resulta kara.
Base sa datus it MIATF-Banga, 21 pa ro nabilin nga aktibong kaso kun sa siin waeo kara ro naka-facility quarantined, daywa ro admitted sa Aklan Provincial Hospital ag 11 ro naka-home quarantined.
Samtang, nag-abot eon sa 129 ro total recoveries.
Sa pihak nga parte, ginaeauman nga maga-umpisa eon sa maabot nga adlaw it Lunes, Mayo 17 ro unang vaccination rollout it lokal nga gobyerno it Banga.
Ginpaathag ni Siyambio nga paga-ayuson nanda sa adlaw it Dominggo ro mga kueang nga kagamitan agud maging haum eon ro tanan sa adlaw it inoculation.
Nakataeana nga bakunahan sa Lunes ro andang mga healthcare workers ag frontliners nga naeakip sa A1 priority.
