KALIBO, Aklan–Blangko si Kalibo Mayor Emerson Lachica sa alegasyon nga nakaangkon it double funding sa planong pagbakae nanda it eugta sa Barangay Andagao, Kalibo nga pagapatindugan kunta it 3-storey nga multi purpose building nga paga-obrahon nga relocation site anay it mga vendors it kalibo public market agud nga maumpisahan eon ro construction it state-of-the-art nga tindahan.
Suno kana nga ro tanan nga mga ginpasa nga ordinansa hay nag agi sa maid-id nga paghimay it konseho rason nga imposibleng maka-eusot ro mga gina alegar nga double funding.
Angot kara, nasubuan sigon imaw sa pagkabitin it ginakabig nga mga mabahoe ag importanteng proyekto it kalibo bangud sa gina-obra nga delay it Sangguniang Bayan it Kalibo ag Sangguniang Panlalawigan.
Gin-kwestiyon man ni Mayor Lachica kon ham-an nga ginpaidaeum pa sa committee hearing ro andang Municipal Ordinance No. 2021-031 ukon pag-utang it masobra sa 691 milyon pesos sa Development Bank of the Philippines (DBP) sa baylo nga review and approval eamang.
Bangud sa nagakatabu, posible suno kana nga indi eon matigayon ro nasambit nga mga proyekto.
