KALIBO, Aklan—Puno makaron it pagdayaw it mga netizen sa social media ro sangka pet lover matapos nga mag-alaga it sangka baboy ag ginhimo pa bilang anang pet.
Sa interbyu it Bombo Radyo, gin-ako mismo ni Febbie Rose Tumbagahan nga nakahiligan eun nanang mag-alaga it nagkaeain eain nga klase it sapat kapareho it ayam.
Apang medyo kakaiba ro sitwasyon makarun bangud sangka baboy nga haeos nagabug-at it 30 kilos ro perming kaibahan kara sa pagkatueog, pagpamasyar sa baybay ag maskin sa anang pagpakaon sa mga ayam.
Suno pa kay Febbie kat urok paeang ro baboy nga gintaw-an nana it pangaean nga si “babe” hay nagaeaum sanda nga raya hay patay eun.
Maskin ro anang nayon nga ina ni babe hay ginatapak-tapakan eun raya ag ginapaeayo hasta nga indi makasuso.
Bangud kara, nagdesisyon sigon si Febbie nga boe-on ro urok ag kato nagpatigayon it mouth to mouth resuscitation.
May pilang minuto ro nagtaliwan, uman nga nabuhi si “babe” ag gulping naghingko ag nag-ihi.
Eubos man ro kalipay ni Febbie kat nakit-an nga buhi si “babe” ag anang ginpa-inom it tubi nga may asukar gamit ro babyron.
Umpisa kato hay owa eun man nana raya ginbalik sa anang inahin kungdi ana eun lang nga gin-alagaan.
Makarun hay ka-bonding eun nana ro nasambitan nga sapat adlaw-adlaw.
