KALIBO, Aklan—Owa nalipay ro pilang grupo it mga Asian American ag Lesbian, Gay, Bisexual, ag Transgender ukon LGBT sa Estados Unidos maskin nga ginpirmahan eon ni President Joe Biden agud nga maging eubus nga laye ro COVID-19 Hate Crimes Act.
Suno kay Bombo International Correspondent Pinoy Gonzales it Houston, Texas, nagapati ro mga raya nga owa natumod ro matuod nga ugat it anti-Asian bias ag owa man nataw-an it atensyon ro police violence kontra sa Black ag brown communities.
Sa baylo hay gintaw-an eamang kara it trabaho ro Department of Justice agud nga magpatigayon it pag-review sa mga kaso it hate crimes angot sa Covid-19 ag pabaskugon ro pagpatuman it laye agud nga maka-usoy it mga importanteng datos sa mga kaparehong krimen.
Owa man sigon it ginpapanaog nga penalidad sa sin-o man nga maga-eabag sa laye.
Nauna eon nga gin aprubahan sa US Senate ro anti-Asian hate crimes bill nga nakabo-oe it 94-1 votes ag 364-62 man sa House of Representatives.
Sa pihak nga parte, ginpabugae ni Gonzales nga mataas ro pagrespeto ag pagtan-aw it mga amerikano sa Filipino bangud kay Manny Pacquiao.
