KALIBO, Aklan—Humampak eon sa kabilugan nga 15,299 ro mga healthcare worker ag senior citizen nga nabakunahan kontra Coronavirus Disease 2019 ukon COVID-19 sa bilog nga probinsya it Aklan.
Sa nasambit nga numero, 9, 205 kara ro mga healthcare workers nga naeakip sa A1 priority group samtang kapin sa 6,093 nga mga senior citizen eon ro nabakunahan.
Suno kay Dr. Leslie Ann Luces it Provincial Health Office ukon PHO-Aklan nga ginakalipay nanda ro mataas nga turnout it vaccination rollout sa probinsya.
Sa kamatuoran suno kana, ro Aklan ro may pinakamataas nga porsyento ukon numero it mga nabakunahan a A1 priority list.
Dugang pa ni Dr. Luces nga nakapatigayun eon it inoculation sa A2 priority group ro tanan nga munisipalidad it Aklan.
Ginpasaeamatan man kara ro pagtinguha it tagsa ka mga lokal nga gobyerno agud ma-engganyo ro andang pumueoyo nga makiparte sa vaccination drive it gobyerno.
Angot kara, nakalista man sigon sanda it pila ka mga mild nga adverse effect matapos nga maturukan partikular ro pagsakit it parte kun siin ginbakunahan, pag-angkon it eagnat ag mild allergic reaction.
