KALIBO, Aklan—Nagbaton it anang unang dose it AstraZeneca vaccine ro 99-anyos nga senior citizen sa banwa it Malay nga personal nga nag agto sa andang vaccination site.
Base sa report it Municipal Health Office ukon MHO-Malay nga ro nasambit nga lola nga residente it Barangay Cubay Sur, Malay ro pinakamagueang nanda nga nabakunahang senior citizen ag owa sigon it anuman nga nabatyagan nga kakaibang epekto sa eawas.
Madumduman nga Mayo 5 kat umarangkada ro vaccination roll-out sa nasamnbit nga banwa kun sa siin prayoridad kara ro A1, A2 ag A3 categories ukon mga frontliners, senior citizens, ag mga tawong may una nga comorbidities.
Angot kara, gin-anunsyo it LGU-Malay nga umpisa hin-aga nga adlaw it miyerkules, Mayo 26 hay paga-umpisahan eon ro pagbakuna sa mga A2 groups sa isla it Boracay nga pagahiwaton sa Paradise Garden Resort Hotel and Convention Center.
Target kara nga mabakunahan ro 134 nga mga naka-rehistro nga senior citizens ag pilang mga nabilin nga frontline health services workers.
Hugut nga ginapadumdumn nga indi sanda magabaton it mga walk-in nga kliyente ag ro paga-trataron eamang hay ro mga naka-schedule nga pagabakunahan.
Tuyo kara nga malikawan ro pagginutok sa site ag masunod ro tamang proseso it pagbakuna.
Samtang, padayun ro andang pag engganyo sa mga senior citizens sa isla nga indi eon magduha-duha nga magpabakuna para man sa andang kaeowasan kontra sa sakit nga COVID-19.
