-- ADVERTISEMENT --

KALIBO, Aklan—Nag-uli it daywang ka mga medalya ro sangka 11 anyos nga Aklanon ag grade 5 student it Kalibo Pilot Elementary School sa daywang ka mga virtual International tournament Competition.

Si Leighanne Militar Jizmundo  hay nag-uli it silver medal sa nagtapos nga Regina Cup 2021 International Rhytmic Gymnastics Online  Tournament kung sa siin ro host country hay Ariel, Israel  nga ginpatigayon ko  Abril 23 hasta 24.

Samtang,  gold medalist man raya sa Ritmica Piemonte Cup 2021 International  Rhytmic Gymnastics Online  Tournament  nga ro host country hay Italy nga ginpatigayon  man ko   Abril 25.

Sa interbyu it bombo radyo, ginpahayag ni Leighanne Militar Jizmundo ro anang eubos nga kalipay bangud sa nabaton nga mga award.

Bukon man sigon kana it bag-o ro pagbaton it award pag-abot sa gymnast bangud 8 anyos pa eamang raya hay nagapasakop eun sa nagkaeain-eain nga kompetisyon maghalin sa lokal, national, ag makarun hay international.

-- ADVERTISEMENT --

Pagpadumdom pa kara sa mga gustong maging gymnast nga indi eamang magsurender ag perming magpadayun agud maabot gid sa ulihi ro ginahandom.

Boses ni Leighanne Militar Jizmundo

Samtang,  ginpahayag man ni Dr. Jelemy Jizmundo ro ina it  gymnast nga si Leighanne Militar Jizmundo, ro anang pag-suporta sa anang unga nga atleta.

Suno kana nga  umpisa kat nakitaan nanda raya it talento hay intsigida nga ginpa-enroll  sa Philippine sports commission  agud makaangkon it maidid nga training.

Gin-enganyo pa kara ro ibang mga ginikanan nga  suportahan ro andang unga kung may  nakahiligan nga sports agud nga indi raya masayang.

Boses ni Dr. Jelemy Jizmundo